غزہ میں دوبارہ شروع کی گئی نسل کشی کا 42واں روز، مزید کئی خاندان شہید کردیے گئے

بصیرت نیوزڈیسک

غزہ کی پٹی میں جنگ بندی کے عارضی دو ماہ کے وقفے کے بعد دوبارہ شسروع کی گئی نسل کشی کو آج 42 واں روز جاری ہے۔ قابض فوج نے عالمی مجرمانہ غفلت ، لاپرواہی اور مسلمان اور عرب دنیا کی بے حسی میں مزید کئی فلسطینیوں کو شہید کردیا ہے۔

ہمارے نامہ نگاروں نے اطلاع دی ہے کہ قابض فوج نے آج سوموار کی صبح غزہ پر درجنوں فضائی حملے کیے اور گھروں کو مسمار کیا۔

نصف شب سے اب تک غزہ کی پٹی پر اسرائیلی جارحیت کے نتیجے میں شہید فلسطینیوں کی تعداد 23 ہو گئی ہے۔

غزہ کی پٹی کے شمال میں بیت لاہیا کے مغرب میں اسرائیلی گولہ باری سے متعدد شہری زخمی ہوگئے۔

قابض فوج نے فلسطینی قیدیوں کی ایک نئی کھیپ کو آج پیر کو رہا کیا جنہیں آج خان ​​یونس کے یورپی ہسپتال منتقل کیاگیا ہے۔

رہا ہونے والوں میں یوسف حاتم ابو طبیخ، زاہدی عبدالسلام البراوی، عبدالہادی المقید، یوسف شہر ابو عودہ، وسیم حسام شلہ،نصر سامی عویدہ،علیان جمال وارش آغا، احمد محمد التابش، وائل طلال ابراہیم، محمد عوض ابو عمرہ اور سیف الدین صلاح بحار کے ناموں سے کی گئی ہے۔

قابض فوج کی طرف سے خان یونس کے مشرق میں عبسان الکبیرہ پر اسرائیلی فضائی حملے میں آج صبح چار بچے زخمی ہوئے۔

عینی شاہدین کے مطابق قابض فوج کے طیاروں نے ایک سائیکل کو نشانہ بنایا جس پر بچے آٹے کا تھیلا لے جا رہے تھے ۔ یہ آٹا انہوں نے اپنے اہل خانہ کو کھلانے کے لیے حاصل کیا تھا۔

وسطی غزہ کی پٹی میں مغازی مہاجر کیمپ پر اسرائیلی فضائی حملے میں ایک لڑکی شہید ہو گئی۔

آج صبح وسطی غزہ کی پٹی میں الزوائدہ قصبے میں ابو ستہ اسٹریٹ پر زرعی اراضی پر اسرائیلی بمباری کے نتیجے میں پانچ شہری زخمی ہوگئے۔

قابض فوج کے طیاروں نے غزہ کی پٹی کے جنوب میں واقع شہر رفح کے مشرقی علاقے پر فضائی حملہ کیا۔

قابض فوج نے غزہ شہر کے مشرق میں واقع التفاح اور الشجاعیہ محلوں اور وسطی غزہ کی پٹی میں البریج کیمپ کے شمال مغرب میں گولہ باری کی۔

قابض فوج نے غزہ شہر کے مشرقی علاقوں کی جانب شدید فائرنگ کی۔

غزہ کے شمال میں جبالیہ کیمپ کے مغرب میں الطیب ہال کے قریب، ابو مہدی خاندان کے گھر پر قابض فوج کی بمباری سے دس افراد شہید اور دیگر زخمی ہوئے۔

غزہ شہر کے شمال مغرب میں مغربی الکرامہ کے علاقے میں قابض فوج کی جانب سے الغماری خاندان کے گھر پر بمباری کے نتیجے میں سات شہری شہید ہو گئے۔

جنوبی غزہ کی پٹی میں خان یونس کے مغرب میں واقع الشافعی کیمپ میں بے گھر افراد کو پناہ دینے والے ایک خیمے کو نشانہ بنانے والے اسرائیلی بمباری میں دو شہید اور دیگر زخمی ہو گئے۔